Ya za ki ji idan aka ce kafofin sada zumunta na zamani sun yi sanadiyyar mutuwar aurenki ko na wata 'yar uwarki ko kawarki?
Za ki iya tuna sau nawa wani ya tura miki wani rubutaccen sako ko hoto ko bidiyo na batsa ko kuma ya yi miki wata magana da ba ta kamata ba?
Kawaye ko 'yan uwanki nawa za ki iya tunawa da suka ba ki labarin cewa an taba cin zarafinsu ta kafofin sada zumunta?
Wannan shi ne yanayin da mata da dama suke rayuwa a ciki sakamakon amfani da kafofin sada zumunta na zamani.
Babu shakka al'amuran zamantakewa sun inganta ta wani fannin, mu'amala tsakanin jama'a ta inganta, nesa ta zama kusa ga 'yan uwa da abokan arziki, duk sakamakon kafofin sada zumunta na intanet.
Baya ga saukin sarrafawa, ana iya amfani da kafofin wajen tura rubutu ko hoto ko bidiyo tsakanin mutum biyu, abin da hakan ke bayar da damar wani abu da ba za a so jama'a su gani ba, in ban da wanda aka tura wa.
Kunya da kawaici da kuma gudun zargi na daga abubuwan da suke hana mata da dama fitowa su bayyana irin wadannan sakonnin da ake tura musu, ko da kuwa ransu bai so ba.
Wasu matan suna samun irin wadannan sakwonni daga 'yan uwa na jini, ko makota, ko abokan karatu ko ma abokan aiki, ko da kuwa dokokin aikin sun hana cin zarafin abokan aiki ta kowace hanya.
Sau da dama dai, irin wadannan sakwonnin da ake tura wa mata suna janyo rashin yarda tsakanin ma'aurata, da sanya zargi daga iyaye ko jama'a ga duk wata da aka ga tamkar tana da alaka da wannan sako.
Hausawa na cewa mutunci madara ne, in ya zube shi ke nan.
Irin wannan ne ya haifar wa wata mata a Ghana babbar matsala tsakaninta da mijinta, zargi ya yi yawa tsakaninsu, har ya kai yana kulle ta a gida, yana yi mata duka saboda zargi, daga karshe ma auren ya rabu.
Da wannan matar ce filin Adikon Zamani na wannan mako ya tattauna domin jin ainihin abin da ya faru da ita.
Title : Yadda kafofin sada zumunta suka kashe min aure'
Description : Ya za ki ji idan aka ce kafofin sada zumunta na zamani sun yi sanadiyyar mutuwar aurenki ko na wata 'yar uwarki ko kawarki? Za ki iya t...
